Türkiyə Qara dənizdə gəmiçilik və taxıl daşımalarının təhlükəsizliyinin təmin olunması ilə bağlı yeni təşəbbüslər üzərində işləyir.
Türkiyənin xarici işlər naziri Hakan Fidan bildirib ki, Ankara bu məsələ ilə bağlı həm Rusiya, həm də Ukrayna ilə əlaqə saxlayır.
Onun sözlərinə görə, Qara dənizdə mövcud vəziyyət təkcə regional təhlükəsizliyə deyil, qlobal ərzaq təhlükəsizliyinə də ciddi təsir göstərir. Bir sıra ölkələr Türkiyədən problemin həllinə töhfə verməsini istəyib.
“Bizim müəyyən hazırlıqlarımız var və onları tərəflərlə müzakirə edirik. Lazımi şərait yarandığı təqdirdə əvvəlki kimi yeni bir razılaşmanın – Qara dəniz taxıl sazişinə bənzər mexanizmin əldə olunması istiqamətində çalışırıq”, – Hakan Fidan deyib.
Türkiyə daha əvvəl də Rusiya və Ukrayna arasında Qara dənizdə təhlükəsiz gəmiçilik və taxıl daşımalarının bərpası ilə bağlı vasitəçilik edib. Hazırda isə bölgədə gəmilərə hücumların artması fonunda Ankara yeni təhlükəsizlik mexanizminin yaradılmasını gündəmə gətirir.
Məsələnin aktuallığı qlobal ərzaq bazarları ilə də bağlıdır. Türkiyənin “Ekonomim” nəşrinin məlumatına görə, Qara dənizdə daşımaların təhlükəsizliyi ilə bağlı vəziyyətin daha da pisləşməsi taxıl qiymətlərinin 10-12 faizədək artmasına səbəb ola bilər. Bu isə dünya ərzaq bazarına əlavə təzyiq yarada bilər.
Beləliklə, Ankara həm Qara dənizdə ticarət gəmiçiliyinin təhlükəsizliyinin təmin olunmasına, həm də Rusiya və Ukraynadan dünya bazarlarına taxıl ixracının bərpasına yönəlmiş yeni mexanizm formalaşdırmağa çalışır.