Fethiye: Adrenalin, təbiət və dəniz bir arada – FOTOLAR
Müasir turistlər səyahət zamanı yalnız tarixi və turistik məkanları ziyarət etməklə kifayətlənmir, fərqli və yaddaqalan təcrübələr axtarırlar. Aktiv istirahət, idman, təbiət gəzintiləri və sağlamlıq proqramlarının bir səfərdə birləşdirilməsi bu baxımdan getdikcə daha çox maraq doğurur. Türkiyənin Muğla vilayətində yerləşən Fethiye isə bu istiqamətdə səyahətçilərə geniş seçimlər təqdim edir.
Fethiyə deyildikdə ilk ağıla gələn məkanlardan biri Ölüdəniz və onun üzərində ucalan Babadağdır. Dünyanın tanınmış yamac paraşütü məkanlarından biri olan Babadağdan uçuş turistlərə Egey sahilinin bənzərsiz mənzərəsini yüksəklikdən seyr etmək imkanı yaradır.
Təxminən 2 min metr yüksəklikdə yerləşən uçuş məntəqələrindən havaya qalxan turistlər peşəkar pilotların müşayiəti ilə tandem uçuşu həyata keçirə bilirlər. Adətən yarım saata yaxın davam edən bu səyahət zamanı Ölüdənizin firuzəyi suları, meşəlik ərazilər və sahil xətti yuxarıdan izlənilir. Daha çox həyəcan axtaranlar isə pilotun nəzarəti altında müxtəlif manevrləri də sınaya bilirlər.
Lakin Fethiyənin təqdim etdiyi imkanlar yalnız yamac paraşütü ilə məhdudlaşmır. Uçuşdan sonra turistləri dəniz, dağ və təbiətlə bağlı çoxsaylı fəaliyyətlər gözləyir. Ölüdənizin çimərliklərində istirahət etmək, ətraf ərazilərdə yürüşlərə çıxmaq və su idmanları ilə məşğul olmaq mümkündür.
Fethiyənin ən çox diqqət çəkən təbiət məkanlarından biri Kəpənəklər Vadisidir. Burada çoxsaylı kəpənək növləri ilə yanaşı, qayalıqlar, yaşıllıqlar və dənizə açılan mənzərələr təbiətsevərlər üçün xüsusi atmosfer yaradır. Vadi həm sakitlik axtaranların, həm də təbiət fotoqraflarının maraq göstərdiyi ünvanlardan biridir.
Kabak körfəzi isə daha sakit və təbiətlə iç-içə istirahət etmək istəyənlərin seçimidir. Faralya ərazisində yerləşən körfəz düşərgə və ekoturizm imkanları ilə seçilir. Burada müxtəlif yerləşmə variantları ilə yanaşı, yoqa və sağlamlıq proqramları da təşkil olunur.
Fethiyənin sahil əraziləri su idmanı həvəskarları üçün də geniş imkanlar yaradır. Dalğıclıqla maraqlananlar bölgənin sualtı məkanlarını araşdıra, təbiətin başqa bir tərəfi ilə tanış ola bilərlər. Macəra axtaranlar üçün isə Saklıkent kanyonu və ətrafındakı fəaliyyətlər xüsusi maraq doğurur.
Bölgənin üstünlüklərindən biri də trekking imkanlarıdır. Fethiye dünyanın tanınmış uzunməsafəli yürüş marşrutlarından biri olan Likya yolunun keçdiyi ərazilərdən biridir. Marşrut boyunca dağlar, meşələr, qədim yaşayış məskənləri və Aralıq dənizinin mənzərələri səyahətçiləri müşayiət edir.
Beləliklə, Fethiye bir səfərdə bir neçə fərqli istirahət formasını birləşdirmək istəyənlər üçün əlverişli istiqamətlərdən biridir. Burada adrenalin həvəskarları yamac paraşütü və raftinglə, təbiətsevərlər yürüş və düşərgə ilə, sakit istirahət axtaranlar isə dəniz və sağlamlıq proqramları ilə vaxt keçirə bilərlər.
Bütün bunlara Egey və Aralıq dənizi mətbəxinin müxtəlif nümunələri də əlavə olunur. Təzə dəniz məhsulları, yerli məhsullardan hazırlanan yeməklər və bölgənin özünəməxsus kulinariya ənənələri Fethiyə səyahətini tamamlayan detallardandır.
Fethiyə məhz bu müxtəlifliyi ilə seçilir: burada bir gün ərzində göydə adrenalin yaşamaq, növbəti saatlarda dəniz sahilində dincəlmək, daha sonra isə təbiət qoynunda yürüşə çıxmaq mümkündür.
