Rusiya ilə Hindistan arasında turistlər üçün viza rüsumlarının ləğv edilməsi məsələsi müzakirə olunur.

Rusiya İqtisadi İnkişaf Nazirliyinin Çoxtərəfli İqtisadi Əməkdaşlıq və Xüsusi Layihələr Departamentinin direktoru Nikita Kondratyev bildirib ki, tərəflər bu istiqamətdə danışıqlar aparırlar.

Onun sözlərinə görə, viza rüsumlarının aradan qaldırılması iki ölkə arasında turizm səfərlərinə tələbatı əhəmiyyətli dərəcədə artıra və turist məhsullarının qiymətinin aşağı düşməsinə imkan verə bilər.

Kondratyev qeyd edib ki, 2026-cı ilin yanvar-iyun aylarında Rusiyaya Hindistandan gələn turistlərin sayı ötən ilin eyni dövrü ilə müqayisədə 10 faiz artıb. Eyni zamanda, Hindistana səfər edən Rusiya vətəndaşlarının sayında da 6 faizlik artım qeydə alınıb.

Rusiya rəsmisi iki ölkə vətəndaşları arasında qarşılıqlı turizm marağının artdığını vurğulayıb. Xüsusilə mədəni irs, tarix və turizm məkanlarına marağın yüksəldiyi bildirilir.

Rusiya son dövrdə müxtəlif ölkələrlə viza rejiminin sadələşdirilməsi istiqamətində də addımlar atır. Çin və Səudiyyə Ərəbistanı ilə vizasız rejimin tətbiqindən sonra Hindistanla bağlı müzakirələrin də Moskvanın turizmin inkişafı və xarici turist axınının artırılması siyasətinin bir hissəsi olduğu görünür.

Viza rüsumlarının ləğvi ilə bağlı razılıq əldə olunacağı təqdirdə, Rusiya-Hindistan turizm əlaqələrinin daha da genişlənəcəyi gözlənilir.