Bu gün səhər Ermənistanın paytaxtı Yerevanda çətin hava şəraiti səbəbindən Vyana-Yerevan reysi Tbilisinin hava limanına eniş edib. Austrian Airlines-ın heyəti sərnişinlərə Yerevana çatmaq üçün öz hesablarına hərəkət etməyi təklif edib, xəbər verilir.
Yerevanın “Zvartnots” aeroportu səhər saatlarında pis hava şəraiti üzündən Avstriyadan gələn təyyarəni qəbul edə bilməyib. Bunun nəticəsində reys ehtiyat hava limanı kimi Tbilisiyə yönləndirilib.
Sərnişinlər bildiriblər ki, təyyarə saat 5-də Yerevana enməli idi, lakin Tbilisidə eniş edib. Eyni zamanda, digər şəhərlərdən gələn təyyarələr normal şəkildə Yerevana eniş edib. Heyət üç saat ərzində sərnişinləri məlumatlandırmayıb, daha sonra isə sərnişinlərə ya öz hesablarına Yerevana getmək, ya da Vyanaya qayıtmaq təklif olunub.
Heyət bildirib ki, onların iş vaxtı bitib və təyyarə artıq Yerevana uçmayacaq, əksinə, yenidən Vyana hava limanına qayıdacaq.
Tbilisi aeroportunda sərnişinləri heç bir şirkət nümayəndəsi qarşılamayıb, hava limanı əməkdaşları isə onlara su, yemək və ya hotellərdə yerləşmə təklif etməyib.

Urbaninfo.az