Azərbaycan İlahiyyat İnstitutu ilə Moskva İslam İnstitutu arasında islam təhsili sahəsində birgə layihələrin həyata keçirilməsi planlaşdırılır.

Rusiya Müsəlmanları Ruhani İdarəsinin birinci müavini Damir Muxitdinov bildirib ki, iki təhsil müəssisəsi tərcümə və kitab nəşri, eləcə də tələbə mübadiləsi istiqamətlərində əməkdaşlıq edəcək.

Onun sözlərinə görə, humanitar sahədə bir sıra yeni layihələrin həyata keçirilməsi nəzərdə tutulur. Bu çərçivədə Azərbaycan və Rusiyanın müvafiq təhsil müəssisələri arasında tələbə mübadiləsinin də genişləndirilməsi planlaşdırılır.

Muxitdinov qeyd edib ki, iki institut artıq Dərbəndin tarixinə həsr olunmuş kitabın hazırlanması ilə bağlı birgə layihə həyata keçirib.

Bundan başqa, Moskva İslam İnstitutunun Azərbaycan Milli Elmlər Akademiyası və Nizami Gəncəvi Mərkəzi ilə əməkdaşlığı da davam etdirilir.