İran qarşıdakı günlərdə ABŞ ilə münasibətlərdə diplomatik uğurlar gözləyir

Qərb mediasının məlumatına görə, İran Xarici İşlər Nazirliyinin sözçüsü Esmaeil Baqaei bildirib ki, Tehran ABŞ ilə gərgin münasibətləri normallaşdırmaq üçün diplomatik imkanları nəzərdən keçirir.
"Tehran qarşıdakı günlərdə nəticə əldə etməyə ümid edir", Baqaei əlavə edib.
İranın xarici işlər naziri Abbas Araqçi bazar günü CNN-ə verdiyi müsahibədə Tehran və Vaşinqtonun İranın nüvə proqramı ilə bağlı danışıqlar apara və razılığa gələ biləcəyini bildirib.
İran XİN rəhbərinin sözlərinə görə, Yaxın Şərqdəki bir neçə dost ölkə vasitəçi kimi çıxış edir və iki tərəf arasında qarşılıqlı etimadı bərpa etməyə çalışır.
"Mənalı danışıqlar etimada əsaslanmalıdır və təəssüf ki, biz danışıqlarda tərəfdaş kimi ABŞ-a olan etimadımızı itirmişik. Bu etimadsızlığı aradan qaldırmalıyıq", Araqçi vurğulayıb.
Eyni zamanda, o, ABŞ-ı öz mənfəətləri naminə bu münaqişəyə cəlb etmək istəyən "müəyyən tərəflərin" olduğunu bildirib, lakin ABŞ prezidenti Donald Trampı "düzgün qərar vermək üçün kifayət qədər müdrik" hesab etdiyini vurğulayıb.
Sosial şəbəkələrdə paylaş