Diplomat mina təhlükəsi və itkin azərbaycanlılarla bağlı beynəlxalq əməkdaşlığa çağırıb

Azərbaycan BMT Baş Assambleyasının 81-ci sessiyasının Üçüncü Komitəsində insan hüquqlarının müdafiəsi ilə bağlı mövqeyini açıqlayıb.

Azərbaycanın BMT yanında Daimi Nümayəndəliyinin birinci katibi Şəhriyar Hacıyev çıxışında müasir dövrdə münaqişələr, bərabərsizlik və iqlim dəyişiklikləri fonunda insan hüquqlarının qorunmasının əhəmiyyətini vurğulayıb.

O bildirib ki, insan hüquq və azadlıqlarının təmin edilməsi Azərbaycanın ən yüksək prioritetlərindəndir. Bu məqsədlə ölkədə ardıcıl hüquqi və institusional islahatlar həyata keçirilir.

Ş.Hacıyev Azərbaycanın BMT-nin insan hüquqları mexanizmləri ilə əməkdaşlığı davam etdirdiyini və müvafiq milli hesabatları mütəmadi təqdim etdiyini deyib.

Diplomat keçmiş münaqişə nəticəsində məcburi köçkün olmuş azərbaycanlıların hüquqlarının bərpasının dövlət üçün prioritet olduğunu qeyd edib. Bildirib ki, “Böyük Qayıdış” Proqramı çərçivəsində görülən işlər nəticəsində 96 min nəfər işğaldan azad edilmiş ərazilərə qayıdıb.

Onun sözlərinə görə, mina təhlükəsi bərpa prosesinə ciddi maneə yaradır. Mina partlayışları nəticəsində 400-dən çox insan həlak olub və ya ağır yaralanıb.

Ş.Hacıyev, həmçinin 4 mindən çox azərbaycanlının itkin düşmüş şəxs kimi qeydiyyatda olduğunu diqqətə çatdırıb.

O, itkin şəxslərin taleyinin müəyyənləşdirilməsi və aşkarlanan kütləvi məzarlıqların beynəlxalq humanitar hüquq çərçivəsində qiymətləndirilməsinin vacibliyini vurğulayıb.

Diplomat Azərbaycanın münaqişə zamanı törədilmiş ağır cinayətlərin araşdırılması və təqsirkarların məsuliyyətə cəlb olunması istiqamətində qətiyyətli addımlar atdığını bildirib.

Ş.Hacıyev insan hüquqlarının siyasiləşdirilməsinə və ikili standartlara qarşı çıxıldığını da qeyd edib.