Bakı xarici siyasətdə suverenlik və qarşılıqlı hörmət prinsiplərini əsas götürür

Azərbaycanın qonşu dövlətlərlə münasibətləri sabit və mehriban qonşuluq ruhunda inkişaf edir.

Bunu Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev CAMCA 2026 Regional Forumunda çıxışı zamanı söyləyib.

Onun sözlərinə görə, qonşu ölkələrlə əlaqələr Azərbaycanın coğrafi reallığından irəli gəlir.

Rusiya ilə münasibətlərdən danışan Hacıyev Bakı ilə Moskva arasında əlaqələrin sabit və normal olduğunu, münasibətlərin mehriban qonşuluq çərçivəsində davam etdiyini bildirib.

O, Azərbaycanın ABŞ-la münasibətlərini yeni strateji səviyyəyə çıxardığını və 2025-ci il avqustun 8-də Vaşinqtonda keçirilən sammitdən əlaqələrin inkişafı üçün istifadə edildiyini qeyd edib.

Hacıyev Azərbaycanın İsraillə yaxşı münasibətlərinin olduğunu da diqqətə çatdırıb. Bununla yanaşı, Azərbaycanın Fələstin dövlətinin yaradılmasını və iki dövlətli həlli dəstəklədiyini vurğulayıb.

İranla münasibətlərə toxunan Prezidentin köməkçisi Azərbaycanın mehriban qonşuluq siyasətinə və dövlətlərin daxili işlərinə qarışmamaq prinsipinə sadiq olduğunu deyib. O bildirib ki, Azərbaycan ərazisindən qonşu dövlətlərə qarşı hər hansı fəaliyyətə yol verilmir.

Hikmət Hacıyev Azərbaycan və Çin arasında hərtərəfli strateji tərəfdaşlığın qurulduğunu və bu əməkdaşlığın praktiki müstəvidə inkişaf etdirildiyini də bildirib.

Onun sözlərinə görə, Azərbaycanın xarici siyasəti şəffaflıq, qarşılıqlı hörmət və dövlətlərin suverenliyinə hörmət prinsiplərinə əsaslanır.