Xələf Xələfov: AQEM məkanında media sahəsində əməkdaşlığın genişləndirilməsi prioritetdir
Prezidentin xüsusi tapşırıqlar üzrə nümayəndəsi media əməkdaşlığının və dezinformasiyaya qarşı birgə mübarizənin əhəmiyyətini vurğulayıb
“Qütbləşmiş dünyada media vasitəsilə etimadın qurulması” mövzusunda keçirilən AQEM Media Forumu dialoqun, qarşılıqlı anlaşmanın və etimadın möhkəmləndirilməsi baxımından xüsusi əhəmiyyət daşıyır.
Bunu Prezidentin xüsusi tapşırıqlar üzrə nümayəndəsi Xələf Xələfov Bakıda keçirilən AQEM Media Forumunda deyib.
O bildirib ki, AQEM platformasında media sahəsi Azərbaycan sədrliyinin gündəliyində prioritet istiqamətlərdən biridir.
“Media sahəsində əməkdaşlığın genişləndirilməsi, peşəkar təcrübə mübadiləsi və dezinformasiyaya qarşı birgə səylərin gücləndirilməsi xüsusi əhəmiyyət daşıyır. Müasir beynəlxalq münasibətlər sistemi dərin transformasiya dövrünü yaşayır. Geosiyasi gərginliyin artması, suverenlik və ərazi bütövlüyü də daxil olmaqla beynəlxalq hüququn əsas prinsiplərinin pozulması qlobal təhlükəsizlik sistemini ciddi sınağa çəkir”, – deyə X.Xələfov bildirib.
Onun sözlərinə görə, dövlətlər arasında qarşılıqlı etimadın möhkəmləndirilməsi, münaqişələrin beynəlxalq hüquq əsasında sülh yolu ilə nizamlanması və dünyanın müxtəlif regionlarında davam edən müharibələrə son qoyulması istiqamətində birgə fəaliyyət xüsusi əhəmiyyət kəsb edir.
X.Xələfov qeyd edib ki, beynəlxalq hüquq ədalətli dünya nizamının qurulması və inkişafı üçün əsas təminat olaraq qalır.
O, Azərbaycanın 30 ildən çox Ermənistanın hərbi təcavüzünün ağır nəticələrindən əziyyət çəkdiyini, ölkənin ərazi bütövlüyünü və suverenliyini beynəlxalq hüququn norma və prinsiplərinə əsaslanaraq bərpa etdiyini bildirib.
“İkinci Qarabağ müharibəsinin nəticəsi olaraq məhz Azərbaycan Prezidenti Ermənistan Respublikasına regionda davamlı sülh yaratmağı təklif edib və sülh prosesinin irəli aparılması üçün bütün real addımları atıb. 2025-ci il avqustun 8-də Vaşinqtonda imzalanmış Birgə Bəyanat və sülh sazişinin paraflanması göstərdi ki, onilliklər boyu davam etmiş münaqişədən sonra belə etimad qurmaq mümkündür”, – deyə Xələf Xələfov vurğulayıb.
O əlavə edib ki, Ermənistanın sülhün hüquqi öhdəliklər əsasında təsbit olunması üçün lazımi addımları atması vacibdir.
