Prezident Administrasiyasının sabiq rəhbəri Ramiz Mehdiyevin cinayət məsuliyyətinə cəlb olunmasından sonra onun özünə və yaxın çevrəsinə aid olduğu bildirilən bir sıra daşınmaz əmlaklara həbs qoyulub.

Gununsesi.info-nun yaydığı məlumata görə, Ramiz Mehdiyevin kürəkəni İlham Əliyev və onun şərikli münasibətdə olduğu bildirilən Xaçmaz rayonunun sabiq icra başçısı Şəmsəddin Xanbabayevlə əlaqəli yeni əmlaklar da üzə çıxıb.

Məlumata əsasən, mümkün müsadirə və ya həbs riskini nəzərə alaraq, şərikli mülkiyyətdə olduğu iddia edilən bəzi obyekt və torpaq sahələri sosial şəbəkələrdə və elan saytlarında satışa çıxarılıb.

Xaçmazda satışa çıxarıldığı bildirilən əmlaklar:

• Xaçmaz şəhərinin mərkəzində, Xalça Muzeyinin yaxınlığında və Rayon İcra Hakimiyyətinin qarşısında yerləşən 300 kvadratmetrlik qeyri-yaşayış sahəsi;
• Mirzəoba kəndində hasarlanmış, artezian sistemi və transformatorla təmin olunan, çıxarışlı 10 hektar torpaq sahəsi;
• Həsənqala kəndində üç göl və 2 hektar çıxarışlı torpaq sahəsi;
• Yalama ərazisində, magistral yolun kənarında yerləşən 85 sot çıxarışlı torpaq sahəsi.

Mənbənin məlumatına görə, Ramiz Mehdiyevin illər ərzində formalaşdırdığı iddia olunan əmlak portfelinə müxtəlif ərazilərdə yerləşən daşınmaz əmlaklar da daxildir.

Bunların sırasında Novxanı qəsəbəsində, Xəzər sahilində yerləşən istirahət kompleksi və digər tikililər, Bakının mərkəzində mənzillər və kommersiya obyektləri, Abşeron və Şamaxı rayonlarında kənd təsərrüfatı təyinatlı torpaq sahələri, həmçinin müxtəlif şirkətlər vasitəsilə idarə olunduğu iddia edilən ticarət və istirahət obyektləri qeyd olunur.

Yayılan məlumatlarda bəzi maliyyə aktivlərinin də sabiq administrasiya rəhbərinin yaxın çevrəsində olan şəxslərin adına rəsmiləşdirildiyi iddia edilir.

Qeyd edək ki, sadalanan əmlakların konkret sahibliyi və onların cinayət işi çərçivəsində hüquqi statusu ilə bağlı məlumatların müvafiq rəsmi qurumlar tərəfindən təsdiqlənməsi tələb olunur.