Azərbaycan Xarici İşlər Nazirliyi Gürcüstan Patriarxlığının Azərbaycanın ərazisində yerləşən Kürmük məbədi ilə bağlı açıqlamasına münasibət bildirib.

XİN-in bəyanatında qeyd olunub ki, Gürcüstan Patriarxlığının açıqlaması Azərbaycan ilə Gürcüstan arasında mövcud olan dostluq, tərəfdaşlıq və mehriban qonşuluq münasibətlərinin ruhuna ziddir.

Bəyanatda Azərbaycanın ərazisində yerləşən coğrafi və tarixi toponimlərin digər adlarla təqdim edilməsinin qəbuledilməz olduğu vurğulanıb.

“Azərbaycan hər zaman Gürcüstanın ərazi bütövlüyünə və suverenliyinə hörmətlə yanaşıb. Gürcüstan tərəfinin də Azərbaycanın ərazi bütövlüyünə və suverenliyinə eyni münasibət sərgiləməsi iki ölkə arasında formalaşmış strateji tərəfdaşlıq münasibətlərinin mühüm əsasını təşkil edir”, - XİN-dən bildirilib.

Nazirlik Gürcüstan Patriarxlığının Azərbaycanın ərazi bütövlüyü və suverenliyinə münasibətdə ərazi iddialarını ehtiva edən yanaşmasının anlaşılmaz olduğunu qeyd edib.

Bəyanatda dini qurumların Azərbaycan və Gürcüstan xalqları arasında əsrlər boyu formalaşmış tarixi dostluq və mehriban qonşuluq münasibətlərinə xələl gətirə biləcək yanaşmalardan çəkinməsinin vacibliyi vurğulanıb.

XİN, həmçinin Gürcüstan Patriarxlığının Ermənistan kilsəsinin məlum yanaşmalarını təkrarlamasının və onun yolu ilə getməsinin məqsədəuyğun olmadığını bildirib.

“Azərbaycan ərazisində mövcud olan bütün tarixi, mədəni və dini abidələr Azərbaycan xalqının və Azərbaycan dövlətinin milli irsinin ayrılmaz tərkib hissəsidir”, - bəyanatda deyilir.