Terrorçuluqla mübarizədə birgə fəaliyyətin əhəmiyyəti qeyd olunub

Prezident İlham Əliyev IV Bakı Təhlükəsizlik Forumunun iştirakçılarına müraciət edib.

Dövlət başçısı müraciətində forumun müxtəlif ölkələrin xüsusi xidmət və təhlükəsizlik orqanlarının nümayəndələrini bir araya gətirdiyini və beynəlxalq təhlükəsizlik məsələləri üzrə fikir mübadiləsi üçün mühüm platforma olduğunu bildirib.

İlham Əliyev dünyada mürəkkəb dəyişikliklərin baş verdiyini, geosiyasi rəqabətin və müxtəlif regionlarda qarşıdurmaların qlobal təhlükəsizlik mühitinə təsir etdiyini qeyd edib.

Onun sözlərinə görə, terrorçuluq və ekstremizm, transmilli cinayətkarlıq, qanunsuz silah və narkotik dövriyyəsi, kibercinayətkarlıq kimi təhdidlər sərhədləri aşaraq daha mürəkkəb xarakter alır.

Prezident müasir texnologiyaların, o cümlədən süni intellektin bədniyyətli istifadəsinin terrorçuluqla mübarizə baxımından yeni risklər yaratdığını vurğulayıb.

Dövlət başçısı təhlükəsizlik sahəsində dövlətlər arasında etimadın və məlumat mübadiləsinin gücləndirilməsinin vacibliyini diqqətə çatdırıb.

İlham Əliyev Azərbaycanın beynəlxalq sülh və təhlükəsizliyin təmin olunmasına, dövlətlər arasında əməkdaşlığın genişləndirilməsinə xüsusi əhəmiyyət verdiyini bildirib.

Prezident forumun nəticələrinin qlobal təhlükəsizliyin möhkəmləndirilməsinə və təhlükəsizlik orqanları arasında əməkdaşlığın inkişafına töhfə verəcəyinə əminliyini ifadə edib.