15 yaşınadək oğlanlar arasında futbol üzrə ilk dünya çempionatı və festivalı ilə əlaqədar Azərbaycana gələcək əcnəbilər və vətəndaşlığı olmayan şəxslər üçün viza prosedurları sadələşdiriləcək.

Bununla bağlı Prezident İlham Əliyev Sərəncam imzalayıb.

Sərəncama əsasən, FIFA U-15 World Cup and Festival tədbiri ilə əlaqədar Azərbaycana gələn və tələb olunan sənədlərdən birini təqdim edən şəxslər 2026-cı il sentyabrın 22-dən noyabrın 5-dək Azərbaycanın beynəlxalq hava limanlarında viza ala biləcəklər.

Viza üçün əsas hesab edilən sənədlər bunlardır:

• Azərbaycan Futbol Federasiyaları Assosiasiyasının (AFFA) rəsmi dəvət məktubu;
• FIFA-nın qaydalarına uyğun elektron qeydiyyat sistemi vasitəsilə akkreditasiyanı təsdiq edən sənəd.

Sərəncama əsasən, Xarici İşlər Nazirliyi viza prosedurlarının sadələşdirilməsi barədə FIFA, Beynəlxalq Hava Nəqliyyatı Assosiasiyası və xarici ölkələrin aidiyyəti qurumlarını məlumatlandıracaq.

Həmçinin məlumatlar XİN-in, Azərbaycanın xarici ölkələrdəki səfirlik və konsulluqlarının internet resurslarında yerləşdiriləcək.

Dövlət Miqrasiya Xidməti isə Azərbaycana uçuşlar həyata keçirən aviaşirkətlərə yeni viza prosedurları barədə məlumat verəcək.