Azərbaycan Prezidenti İlham Əliyev və birinci xanım Mehriban Əliyeva sentyabrın 17-də Şamaxı rayonunda “Meysari Grand Hotel & SPA” kompleksinin açılışında iştirak ediblər.

“Pasha Hospitality” şirkətinin baş icraçı direktoru Mehmet Balçik dövlət başçısına və birinci xanıma kompleks barədə məlumat verib.

Bildirilib ki, Meysəri kəndində, dəniz səviyyəsindən 1050 metr yüksəklikdə yerləşən kompleks hotel və kotteclər, restoranlar, konfrans mərkəzi, SPA və sağlamlıq mərkəzi, idman və istirahət zonaları, uşaq əyləncə mərkəzi, avtomobil dayanacağı və helikopter meydançasından ibarətdir.

Kompleksin əsas hotel binasında 88, kotteclərdə isə 116 otaq olmaqla, ümumilikdə 204 otaq yaradılıb. Ərazidə 3 villa da yerləşir.

Kompleksdə 3 hovuz, idman və pilates zalları, tennis və padel kortları, futbol meydançası və uşaq əyləncə mərkəzi yaradılıb.

Ərazidə 420 nəfərlik Nəsimi Konfrans Mərkəzi də fəaliyyət göstərəcək. Burada konfrans, toplantı, təqdimat və işgüzar görüşlərin keçirilməsi üçün şərait yaradılıb.

Kompleksdə qapalı və açıq avtomobil dayanacaqları, həmçinin helikopter meydançası inşa olunub.

Məlumata görə, layihə çərçivəsində 320 yeni iş yerinin yaradılması nəzərdə tutulur.