Azərbaycan Prezidenti İlham Əliyev Türk Dövlətləri Təşkilatına üzv ölkələrin Təhlükəsizlik Şuraları katiblərinin Beşinci Toplantısının iştirakçılarına müraciət ünvanlayıb.

Müraciətdə bildirilib ki, türk dövlətlərini birləşdirən ortaq dəyərlər və qardaşlıq münasibətləri TDT-nin beynəlxalq nüfuzunun artmasında mühüm rol oynayır.

Prezident qeyd edib ki, Azərbaycan TDT-yə sədrliyi çərçivəsində üzv ölkələr arasında həmrəyliyin möhkəmləndirilməsi, qarşılıqlı fəaliyyətin genişləndirilməsi və regionda sülhün təmin olunması istiqamətində səylər göstərir.

Dövlət başçısı Azərbaycanın Qarabağda qazandığı Zəfərin regionda yeni geosiyasi reallıq formalaşdırdığını bildirib.

“Bu Zəfər ölkələrimizi iqtisadi, logistik və strateji baxımdan birləşdirən Zəngəzur dəhlizinin reallaşmasına zəmin yaratdı”, - deyə müraciətdə qeyd olunub.

İlham Əliyev Orta Dəhliz, Zəngəzur dəhlizi və digər nəqliyyat bağlantılarının inkişafının Türk dövlətlərinin iqtisadi imkanlarının artırılması baxımından əhəmiyyətini vurğulayıb.

Prezident beynəlxalq təhlükəsizlik mühitində yeni çağırışların yarandığını qeyd edərək, bu istiqamətdə dövlətlər arasında koordinasiyanın vacibliyini diqqətə çatdırıb.

Müraciətdə terrorçuluq, ekstremizm, kibertəhdidlər və transmilli cinayətkarlıqla mübarizədə birgə fəaliyyətin önəmi xüsusi vurğulanıb.