Hakan Fidan Azərbaycana səfərini belə dəyərləndirdi: “İki sabitlik adasıyıq”
Türkiyənin xarici işlər naziri Hakan Fidanın Azərbaycana səfəri başa çatıb.
Nazir səfərin yekunları ilə bağlı “X” hesabında paylaşım edərək Bakı səfərindən söz açıb. O, Bakının işğaldan azad edilməsinin 108-ci ildönümündə Azərbaycanda olmasını “gözəl bir təsadüf” kimi qiymətləndirib.
Hakan Fidan səfər zamanı Azərbaycan Prezidenti İlham Əliyev tərəfindən qəbul edildiyini, həmçinin xarici işlər naziri Ceyhun Bayramovla geniş müzakirələr apardığını bildirib.
“Bölgəmizdəki böhranları dəyərləndirdik, Cənubi Qafqazda davamlı sülh, sabitlik və rifahın təmin olunması, eləcə də Türk dünyasının ortaq gələcəyi ilə bağlı fikir mübadiləsi apardıq”, – deyə o yazıb.
Fidanın sözlərinə görə, görüşlərdə iqtisadi-ticari əlaqələrin inkişaf etdirilməsi, enerji və nəqliyyat sahələrində birgə layihələr, eləcə də təhlükəsizlik sahəsində əməkdaşlıq məsələləri müzakirə olunub.
Türkiyənin xarici işlər naziri regionda mövcud problemlərə diqqət çəkərək Türkiyə və Azərbaycanın “iki sabitlik adası” olduğunu vurğulayıb.
O, Ankara ilə Bakı arasında əməkdaşlığın bundan sonra da dərinləşdiriləcəyini və ortaq hədəflər istiqamətində birgə fəaliyyətin davam etdiriləcəyini qeyd edib.
