Prezident: “Azərbaycan ərazi bütövlüyünü və milli ləyaqətini bərpa edib”
Azərbaycan Prezidenti İlham Əliyev bildirib ki, Azərbaycan xalqı işğal olunmuş torpaqlarını azad etməklə dünyada mühüm presedent yaradıb.
Dövlət başçısı bu barədə Bakıda beynəlxalq konfransların iştirakçıları ilə görüşü zamanı danışıb.
Prezident qeyd edib ki, Azərbaycan uzun illər davam edən işğala son qoyaraq öz hüququnu və ədaləti bərpa edib.
“Azərbaycan xalqı qan tökərək, döyüşərək bu torpaqları azad etdi. Şəhidlərimizin canı-qanı, qəhrəman övladlarımızın fədakarlığı hesabına biz öz ədalətimizi, hüququmuzu və milli ləyaqətimizi bərpa etdik”, - İlham Əliyev vurğulayıb.
Onun sözlərinə görə, Qarabağ və Şərqi Zəngəzurda aparılan bərpa işləri zamanı işğalın ağır nəticələri üzə çıxıb.
Prezident bildirib ki, Azərbaycan xalqı Xocalı faciəsini, dağıdılmış məscidləri və mədəni irsə vurulan ziyanı heç vaxt unutmayacaq.
“Bu gün sülh prosesi gedir və əminəm ki, bu, uzunmüddətli olacaq. Lakin biz ayıq olmalıyıq. Azərbaycanın suverenliyinin və müstəqilliyinin əsas təminatı xalqın birliyi, iradəsi və güclü ordusudur”, - dövlət başçısı qeyd edib.
