Bakıda beynəlxalq konfransların iştirakçıları ilə görüş çərçivəsində Azərbaycan Prezidenti İlham Əliyev və Qafqaz Müsəlmanları İdarəsinin sədri Şeyxülislam Allahşükür Paşazadə arasında fikir mübadiləsi aparılıb.

Söhbət zamanı Şeyxülislam Allahşükür Paşazadə Prezident İlham Əliyevə Özbəkistana səfəri zamanı Mir-i Ərəb mədrəsəsini ziyarət etdiyinə görə təşəkkürünü ifadə edib.

O bildirib ki, dövlət başçısının bu ziyarəti milli-mənəvi dəyərlərə göstərilən diqqətin növbəti nümunəsidir.

Prezident İlham Əliyev isə Mir-i Ərəb mədrəsəsində çəkilən xatirə fotosu barədə danışıb. Dövlət başçısı həmin məkanın tarixi əhəmiyyətini qeyd edib.

Söhbət zamanı mədrəsənin türk dünyası üçün əhəmiyyətindən, eləcə də burada tanınmış şəxslərin təhsil almasından bəhs olunub.

Allahşükür Paşazadə türk dövlətlərinin müsəlman dini liderlərinin görüşlərinin xalqlar arasında əlaqələrin möhkəmlənməsinə töhfə verdiyini bildirib.

Prezident İlham Əliyev beynəlxalq konfransların gələcəkdə mütəmadi keçirilməsi imkanını diqqətə çatdırıb. O qeyd edib ki, bu cür toplantılar fikir mübadiləsi, müzakirələr və birliyin nümayişi baxımından mühüm platformaya çevrilə bilər.

Dövlət başçısı bununla bağlı təkliflərin hazırlanmasını bildirib. Şeyxülislam Allahşükür Paşazadə isə göstərilən diqqətə görə təşəkkürünü ifadə edib.