Əziz Səncərdən İlham Əliyevə təşəkkür: “Azərbaycan qəlbimdə Türkiyə qədər doğmadır”
Kimya üzrə Nobel mükafatı laureatı Əziz Səncər Azərbaycan Prezidenti İlham Əliyevə təşəkkür məktubu yazıb.
Dünya şöhrətli türk alimi məktubunda “Şöhrət” ordeni ilə təltif olunmasını həyatının ən böyük qürurverici və sevindirici hadisələrindən biri adlandırıb.
O, bu yüksək təltifə görə Prezident İlham Əliyevə minnətdarlığını ifadə edib.
Əziz Səncər bildirib ki, Azərbaycana sevgisi hər zaman səmimi olub və heç bir qarşılıq gözləməyib. Alim Azərbaycanın onun qəlbində Türkiyə qədər doğma yer tutduğunu qeyd edib.
O vurğulayıb ki, “Şöhrət” ordenini həm elmi fəaliyyətinə göstərilən yüksək ehtiramın, həm də “Bir millət, iki dövlət” ideyasına söykənən Azərbaycan-Türkiyə qardaşlığının rəmzi kimi daşıyacaq.
Qeyd edək ki, Prezident İlham Əliyevin 7 sentyabr 2026-cı il tarixli Sərəncamına əsasən, Əziz Səncər Azərbaycanın beynəlxalq elmi və humanitar əməkdaşlığının inkişafına verdiyi xüsusi xidmətlərə görə “Şöhrət” ordeninə layiq görülüb.
