ABŞ Venesuela məsələləri üzrə Kolumbiyadakı səfirliyində fəaliyyət göstərən bölməyə yeni müvəqqəti işlər vəkili təyin edib. Vaşinqtonun qərarına əsasən, bu vəzifəyə ABŞ-ın Nikaraqua və Hondurasdakı sabiq səfiri Laura Doqu gətirilib. Məlumat ABŞ-ın Kolumbiyadakı diplomatik nümayəndəliyinin rəsmi saytında yer alıb.
“Tiempo” qəzetinin yazdığına görə, Laura Doqunun əsas vəzifəsi Vaşinqtonla Karakas arasında diplomatik əlaqələrin bərpası istiqamətində iş aparmaq olacaq. ABŞ-ın Venesueladakı səfirliyinin məlumatına əsasən, diplomat bundan əvvəl Meksika, Salvador, Türkiyə və Misirdə çalışıb.
Qeyd edək ki, yanvarın 9-da ABŞ Dövlət Departamentinin nümayəndə heyəti Venesuelada keçirilmiş hərbi əməliyyatlardan sonra ilk dəfə bu ölkəyə səfər edərək, Karakasdakı ABŞ səfirliyinin fəaliyyətinin bərpası imkanlarını qiymətləndirib. ABŞ 2019-cu ildə Venesueladakı səfirliyinin işini dayandırmışdı.
Xatırladaq ki, yanvarın 3-də ABŞ Silahlı Qüvvələri Venesuelaya hava zərbələri endirib. Hücumlar Karakasda, həmçinin Fort-Tiuna hərbi bazasında və bir sıra strateji obyektlərdə qeydə alınıb. ABŞ Prezidenti Donald Tramp əməliyyatı “uğurlu” adlandıraraq, Venesuela Prezidenti Nikolas Maduronun və həyat yoldaşı Silia Floresin saxlanılaraq ABŞ-a aparıldığını bildirib. Maduraya qarşı narkoterrorizm və kokain qaçaqmalçılığı ittihamları irəli sürülüb.