Azərbaycanda akkreditə olunmuş diplomatik nümayəndəliklərin rəhbər və təmsilçilərinin Qarabağ və Şərqi Zəngəzura səfəri yekunlaşıb.

İki gün davam edən səfərdə 58 ölkə və 9 beynəlxalq təşkilatdan 150 nümayəndə iştirak edib. Səfər Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyevin müşayiəti ilə təşkil olunub.

Diplomatik korpusun nümayəndələri Xankəndi və Şuşa şəhərləri, eləcə də Ağdərə və Kəlbəcər rayonlarında aparılan bərpa-quruculuq işləri ilə tanış olublar.

Səfər iştirakçılarına sosial və iqtisadi infrastruktur layihələri, tarixi və mədəni irsin qorunması və bərpası istiqamətində həyata keçirilən tədbirlər barədə məlumat verilib.

Bu səfər diplomatik korpus nümayəndələrinin 2020-ci ildən etibarən Azərbaycanın işğaldan azad edilmiş ərazilərinə 22-ci səfəri olub.