Tacikistanın Azərbaycandakı səfiri İlhom Abdurahmon Şuşaya səfərləri və şəhərdə aparılan quruculuq işləri barədə danışıb.

Diplomat AZƏRTAC-a müsahibəsində Şuşaya 10 dəfədən çox səfər etdiyini və şəhərin onda xüsusi təəssürat yaratdığını bildirib.

“Bu, Şuşaya ilk səfərim deyil. Mən artıq 10 dəfədən çox Şuşa şəhərində olmuşam. Demək olar ki, Şuşaya vurulmuşam”, - deyə o qeyd edib.

İ.Abdurahmon Şuşanın tarixi memarlığının, yeni binaların, abadlaşdırılan infrastrukturun və həyata keçirilən bərpa işlərinin diqqətçəkən olduğunu vurğulayıb. Onun sözlərinə görə, hər səfərində şəhərdə yeni dəyişikliklərin şahidi olur.

“Bu, Prezident İlham Əliyevin böyük xidmətidir. O, bu regionun inkişafına böyük diqqət ayırıb. Hər səfərim zamanı yeni dəyişikliklərin şahidi oluram”, - deyə səfir bildirib.

O, Qarabağ sakinləri üçün yaradılan şəraitin əhəmiyyətini də qeyd edib. Diplomat bərpa edilmiş şəhərlərdə insanların rahat və firavan yaşayacağına ümid etdiyini söyləyib.

Səfir Şuşada yeni məscidin tikintisini də gördüyünü və onun açılışında iştirak etməkdən məmnun olacağını bildirib.

“Çünki burada təkcə infrastruktur deyil, hər şey yaradılıb. Ona görə də yalnız sevinmək, dövlətə təşəkkür etmək və həyatdan zövq almaq lazımdır”, - deyə İ.Abdurahmon əlavə edib.