Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Qarabağda yerləşən Gəncəsər və Xudavəng monastırlarından video yayımlayıb.

H.Hacıyev sosial şəbəkədə paylaşdığı görüntülərə əlavə etdiyi qeyddə Gəncəsər monastırının XIII əsrdə Qafqaz Albaniyasının hökmdarı Həsən Cəlal tərəfindən inşa etdirildiyini bildirib. Onun sözlərinə görə, abidə Qafqaz Albaniyasının zəngin xristian irsinin mühüm nümunələrindən hesab olunur.

Prezidentin köməkçisi qeyd edib ki, işğal dövründə Gəncəsər və Xudavəng kimi tarixi abidələr “bərpa” adı altında müxtəlif müdaxilələrə məruz qalıb. Bunun nəticəsində onların memarlıq xüsusiyyətlərinə və autentikliyinə zərər dəyib.

H.Hacıyev Azərbaycanın ərazisində yerləşən tarixi, mədəni və dini abidələrin mənşəyindən və dini mənsubiyyətindən asılı olmayaraq ölkənin ümumi mədəni irsinin tərkib hissəsi olduğunu vurğulayıb.

“Azərbaycan dövləti bu abidələrin qorunması, mühafizəsi və bərpasına sadiqdir”, - deyə o bildirib.

H.Hacıyev Azərbaycanın multikultural və çoxkonfessiyalı irsin qorunması istiqamətində təcrübəsinin beynəlxalq səviyyədə qəbul edildiyini diqqətə çatdırıb. O, ölkənin bu təcrübəni digər dövlətlərlə, xüsusilə qonşu ölkələrlə bölüşməyə hazır olduğunu qeyd edib.

Prezidentin köməkçisi tarixi abidələrlə bağlı yanlış məlumatlar yayan media qurumlarını abidələri yerində görməyə və faktlarla tanış olmağa dəvət edib.

Səfər zamanı H.Hacıyev, həmçinin Həsən Cəlal Dövlənin nəslinin nümayəndəsi Həsən Cəlal Allahverdibəyin məzarüstü abidəsini də ziyarət edib və onun fotosunu paylaşıb.

H.Hacıyev bildirib ki, sözügedən abidə əsrlər boyu qorunub saxlanılan tarixi varisliyin və əcdadların yaddaşının maddi ifadəsidir.