Azərbaycanın Baş prokuroru Kamran Əliyevin rəhbərlik etdiyi nümayəndə heyəti Qazaxıstanlı həmkarı Berik Asılovun dəvəti ilə Türküstan şəhərinə rəsmi səfər edib.

Səfərin ilk günü Kamran Əliyevlə Qazaxıstanın Baş prokuroru Berik Asılov arasında görüş keçirilib.

Görüşdə Azərbaycan və Qazaxıstan arasında müxtəlif sahələrdə inkişaf edən əməkdaşlıq, xüsusilə prokurorluq orqanları arasında mövcud əlaqələrin vəziyyəti və gələcək perspektivləri müzakirə edilib.

Kamran Əliyev Azərbaycan-Qazaxıstan münasibətlərinin dövlət başçılarının siyasi iradəsi və qarşılıqlı etimadı əsasında strateji tərəfdaşlıq və müttəfiqlik səviyyəsində inkişaf etdiyini bildirib. O, iki ölkənin prokurorluq qurumları arasında əməkdaşlığın da bu münasibətlərin mühüm istiqamətlərindən biri olduğunu qeyd edib.

Baş prokuror Azərbaycanın işğaldan azad edilmiş ərazilərində aparılan bərpa və yenidənqurma prosesində Qazaxıstanın dəstəyini xüsusi qeyd edib. Füzulidə Kurmanqazı adına Uşaq Yaradıcılıq Mərkəzinin istifadəyə verilməsi, həmçinin şəhərdə inşa ediləcək Mərkəzi Rayon Xəstəxanasının layihəsində Qazaxıstan şirkətinin iştirakı iki ölkə arasında əməkdaşlığın konkret nümunələri kimi diqqətə çatdırılıb.

Görüşdə qarşılıqlı maraq doğuran məsələlər, eləcə də prokurorluq orqanları arasında ikitərəfli və çoxtərəfli əməkdaşlığın genişləndirilməsi imkanları ətrafında fikir mübadiləsi aparılıb.

Sentyabrın 11-də Kamran Əliyev Türküstan şəhərində Türk Dövlətləri Təşkilatına üzv dövlətlərin Baş Prokurorları Şurasının 5-ci iclasına qatılıb.

Çıxışında tədbirin yüksək səviyyədə təşkilinə görə Qazaxıstanın Baş prokuroru Berik Asılova təşəkkür edən Kamran Əliyev Azərbaycanda şəhərsalma və memarlıq sahəsində qanunçuluğun təmin edilməsində prokurorluq orqanlarının rolundan danışıb.

O bildirib ki, ölkənin iqtisadi inkişafı şəhərlərin müasir görkəm almasına şərait yaradıb. Bununla yanaşı, Azərbaycanın tarixi-memarlıq irsinin və milli ənənələrin qorunmasına xüsusi əhəmiyyət verilir.

Səfər çərçivəsində Türkiyənin Baş prokuroru Muhsin Şentürkün rəhbərlik etdiyi nümayəndə heyəti ilə də görüş keçirilib. Görüşdə Azərbaycan-Türkiyə münasibətlərinin yüksək səviyyəsi və iki ölkə lideri İlham Əliyev və Rəcəb Tayyib Erdoğan arasında dostluq və qardaşlıq əlaqələrinin türk dünyasının birliyinə töhfəsi qeyd olunub.

Tərəflər prokurorluq orqanları arasında əməkdaşlığın genişləndirilməsi, eləcə də birgə beynəlxalq tədbirlərin keçirilməsi məsələlərini müzakirə ediblər.