Avropa ABŞ tərəfindən Qrenlandiya ətrafında səslənən təhdidlər fonunda öz maraqlarını müdafiə etmək gücündə olduğunu nümayiş etdirib. Bu barədə Fransa Prezidenti Emmanuel Makron Brüsseldə jurnalistlərə açıqlamasında bildirib. Məlumatı “İnterfaks” yayıb.
Makron qeyd edib ki, həftənin əvvəlində müşahidə olunan gərginlik, o cümlədən ABŞ Prezidenti Donald Trampın təhdidləri, mümkün müdaxilə və gömrük rüsumları ilə bağlı bəyanatlardan sonra vəziyyət daha məqbul məcraya qayıdıb. Bununla belə, Fransa lideri Avropanın ayıq-sayıq olmasının vacibliyini vurğulayıb.
Prezidentin sözlərinə görə, Avropa birgə hərəkət etdikdə təhdidlər qarşısında hörmət qazana və maraqlarını qoruya bilir. O bildirib ki, Avropaya təzyiq göstərilən hallarda həmrəylik nümayiş etdirmək və mövcud mexanizmlərdən istifadə etmək tamamilə təbiidir.