Qarabağda aparılan bərpa və quruculuq işləri çərçivəsində 2020-ci ildən indiyədək 45-dən çox yaşayış məntəqəsi yenidən inşa edilərək keçmiş məcburi köçkünlərin istifadəsinə verilib.

Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev bu barədə Xankəndi şəhərindəki Mədəniyyət Mərkəzində çıxışı zamanı məlumat verib.

H.Hacıyev bildirib ki, artıq 40 mindən çox keçmiş məcburi köçkün Qarabağa qayıdıb:

“Daha çox insan da qayıdacaq. Bu, böyük qürurdur”.

Onun sözlərinə görə, hazırda Qarabağda təxminən 100 min mülki şəxs yaşayır, işləyir və təhsil alır.

Prezidentin köməkçisi Azərbaycanın münaqişədən sonrakı bərpa və yenidənqurma istiqamətində formalaşdırdığı təcrübənin beynəlxalq əhəmiyyət daşıdığını qeyd edib.

“Azərbaycanın təcrübəsi münaqişələrdən və müharibələrdən əziyyət çəkən dünyanın digər hissələrində də tətbiq üçün faydalı ola bilər”, – deyə H.Hacıyev vurğulayıb.

O əlavə edib ki, Azərbaycanın ev sahibliyi etdiyi Ümumdünya Şəhərsalma Forumu əməkdaşlığın, qarşılıqlı əlaqələrin, eləcə də təcrübə və bilik mübadiləsinin bu prosesdə mühüm rol oynadığını göstərib