Süni intellekt texnologiyalarının təhsil sahəsində tətbiqi müəllimlərin gündəlik fəaliyyətinin daha səmərəli təşkilinə və vaxtdan düzgün istifadəsinə kömək edə bilər.

Dövlət İmtahan Mərkəzinin (DİM) İdarə Heyətinin sədri Məleykə Abbaszadə bunu təhsil işçilərinin sentyabr konfransında çıxışı zamanı bildirib.

Onun sözlərinə görə, müəllimlər üçün süni intellekt əsaslı fərdi assistentlərin yaradılması gündəlik işlərin planlaşdırılması, iş qrafikinin hazırlanması və fəaliyyətin daha effektiv idarə olunmasına imkan verə bilər.

M.Abbaszadə qeyd edib ki, bu texnologiyalardan səmərəli yararlanmaq üçün müəllimlərin süni intellekt alətlərindən istifadə üzrə bacarıqlarının inkişaf etdirilməsi və müvafiq təlimlərin keçirilməsi vacibdir.

DİM sədri əlavə edib ki, müasir uşaqlarla işləyən müəllimlər üçün vaxtın düzgün bölüşdürülməsi və idarə edilməsi xüsusi əhəmiyyət daşıyır.