Azərbaycan Respublikasında qida təhlükəsizliyinin təmin edilməsi istiqamətində yeni Dövlət Proqramı təsdiqlənib.

Prezident İlham Əliyevin imzaladığı Sərəncamla “Azərbaycan Respublikasında qida təhlükəsizliyinin təmin edilməsinə dair 2027–2032-ci illər üçün Dövlət Proqramı” qüvvəyə minib.

Sərəncama əsasən, proqramda nəzərdə tutulan tədbirlərin icrası və əlaqələndirilməsi Azərbaycan Qida Təhlükəsizliyi Agentliyinə həvalə olunub. AQTA tədbirlərin icrasına nəzarət etməli və proqramın icra vəziyyəti barədə ildə bir dəfə dövlət başçısına məlumat təqdim etməlidir.

Dövlət Proqramının icrasının monitorinqi və qiymətləndirilməsi İqtisadi İslahatların Təhlili və Kommunikasiya Mərkəzi tərəfindən, AQTA-nın sifarişi əsasında aparılacaq.

Bundan əlavə, Maliyyə Nazirliyi və İqtisadiyyat Nazirliyi AQTA ilə birgə proqramda nəzərdə tutulan tədbirlərin maliyyələşdirilməsi üçün dövlət büdcəsinin və dövlət investisiya proqramlarının hazırlanması zamanı müvafiq maliyyə vəsaitlərinin ayrılmasını təmin etmək məqsədilə tədbirlər görəcək.

Nazirlər Kabineti də Sərəncamdan irəli gələn məsələlərin həllini təmin etməlidir.