Rusiya Xarici İşlər Nazirliyi bildirib ki, hazırda Rusiya və Gürcüstan arasında siyasi dialoqun bərpası üçün heç bir əsas yoxdur. Nazirliyin rəsmi nümayəndəsi Mariya Zaxarova brifinqdə deyib:
"Tbilisi ilə siyasi dialoqun bərpası ilə bağlı, təəssüf ki, hələlik heç bir əsas yoxdur."
O, həmçinin qeyd edib ki, Gürcüstanın rifahı konfrontasiya deyil, əməkdaşlıqdan asılıdır və bu fikri getdikcə daha çox gürcü siyasətçi və vətəndaş dəstəkləyir.
Zaxarova vurğulayıb ki, Moskva və Tbilisi arasında əməkdaşlıq həm iqtisadi sahədə, həm də turizm sahəsində artır:
2025-ci ildə ticarət dövriyyəsi 6% artaraq 2,7 milyard dollara çatıb.
Rusiya Gürcüstan üçün əsas ticarət tərəfdaşıdır.
Rusiyalı turistlərin sayı isə 11% artaraq 1,5 milyondan çox olub.
Rusiya nümayəndəsi əlavə edib ki, Gürcüstan rəhbərliyi Rusiya ilə əlaqələri pozmur və Qərbin təzyiqinə baxmayaraq öz maraqlarını qoruyur:
"Biz Gürcüstanla praqmatik münasibətlər qurmağa çalışırıq və hesab edirik ki, əlaqələrimiz qonşuluq, dərin tarixi və mədəni bağlar, həmçinin mənəvi həmrəylik səbəbindən təbii xarakter daşıyır."