Türkiyə Prezidenti Rəcəb Tayyib Ərdoğan Birləşmiş Ərəb Əmirliklərinin (BƏƏ) Prezidenti Şeyx Məhəmməd bin Zayed Al Nəhyanla telefon danışığı aparıb.

“Report” xəbər verir ki, bu barədə Türkiyə Prezident Administrasiyasının Kommunikasiya İdarəsi məlumat yayıb.

Telefon danışığı zamanı Türkiyə ilə BƏƏ arasında ikitərəfli münasibətlər, həmçinin regional və qlobal məsələlər ətrafında fikir mübadiləsi aparılıb.

Ərdoğan iki ölkə arasında, xüsusilə müdafiə sənayesi və iqtisadiyyat sahələrində əməkdaşlığın bundan sonra da genişlənəcəyini bildirib. O, Ankara ilə Əbu-Dabi arasındakı əlaqələrin inkişaf etdirilməsi istiqamətində səylərin davam etdiyini vurğulayıb.

Türkiyə Prezidenti İran-ABŞ gərginliyinin və regionda mövcud olan digər münaqişələrin sona çatdırılması üçün Ankaranın diplomatik səylər göstərdiyini qeyd edib.

Ərdoğan Türkiyənin sülh yönümlü diplomatik təşəbbüslərini davam etdirəcəyini, regiondakı qardaş ölkələrə qarşı hücumları qəbul etmədiklərini bildirib. O, digər regional məsələlər üzrə də Türkiyə ilə BƏƏ arasında əməkdaşlığın vacibliyini vurğulayıb.