İngiltərənin “Lids Yunayted” klubunun idman direktoru Adam Andervud “Monako”nun yarımmüdafiəçisi Aleksandr Qolovinin transferindən siyasi səbəblərlə imtina edilməsi barədə məlumatı təkzib edib. Bu barədə “Çempionat” məlumat yayıb.

“Biz bu futbolçunu heç vaxt “Lids” üçün nəzərdən keçirməmişik”, — deyə Andervud bildirib.

Daha əvvəl KİV-də “Lids”in yay transfer pəncərəsi bağlanana qədər Qolovinin transferini rəsmiləşdirməyə çalışdığı barədə məlumat yayılmışdı. Bildirilirdi ki, əsas maneə Böyük Britaniya banklarının Rusiyanın fiziki və hüquqi şəxslərinə xidmət göstərməyi faktiki olaraq dayandırması səbəbindən futbolçuya maaş ödənişlərinin sabit şəkildə həyata keçirilməsinə zəmanət verməyin mümkün olmaması olub.

Qolovin 2018-ci ildən “Monako”da çıxış edir. O, ötən mövsüm bütün turnirlərdə klubun heyətində 35 oyun keçirib, 5 qol vurub və 6 məhsuldar ötürmə edib. Onun Fransa klubu ilə müqaviləsi 2027-ci ilin yayına qədər qüvvədədir.

Fransa çempionatında keçirilən iki turdan sonra “Monako” 6 xalla turnir cədvəlinə başçılıq edir. Komanda 2026/27 mövsümünə hər iki oyunda qələbə ilə başlayan Liqa 1-in yeganə klubu olub. “Marsel” isə 3 xalla 8-ci pillədə qərarlaşıb.