BMT-nin baş katibi Antonio Quterreş ABŞ-ın İrana endirdiyi son hava zərbələri nəticəsində mülki şəxslərin həlak olması barədə məlumatlardan ciddi narahatlığını bildirib.

Bu barədə Quterreşin sözçüsü Stefan Düjarrik açıqlama verib.

Onun sözlərinə görə, BMT baş katibi İranda mülki əhali arasında itkilərlə bağlı xəbərlərdən, o cümlədən ABŞ zərbələrindən birinin toy mərasiminə düşməsi barədə məlumatlardan “dərindən narahatdır”.

Düjarrik bildirib ki, Quterreş mülki şəxslərə qarşı istənilən hücumu pisləyir.

Xatırladaq ki, daha əvvəl İranın cənubunda yerləşən Hörmüzqan əyaləti qubernatorunun müavini Əhməd Nəfisi ABŞ hərbi hava qüvvələrinin toy mərasiminə endirdiyi zərbə nəticəsində 68 nəfərin yaralandığını açıqlamışdı.

Bir müddət sonra İran hakimiyyəti 4 nəfərin öldüyünü bildirmiş, bəzi KİV-lər isə İran Qızıl Aypara Cəmiyyətinə istinadən ölənlərin sayının 5 nəfər olduğunu yazmışdı.