ABŞ ordusu İranın cənub sahillərində yerləşən bir sıra hədəflərə, o cümlədən bir neçə mülki obyektə zərbələr endirib.

Bu barədə İslam İnqilabı Keşikçiləri Korpusunun (SEPAH) “Telegram” kanalında məlumat yayılıb.

SEPAH-ın açıqlamasına görə, ABŞ tərəfindən İran ərazisində çoxsaylı nöqtələrə hava zərbələri endirilib. Bəyanatda hücumların İranın cənub sahillərində yerləşən obyektlərə də istiqamətləndirildiyi və onların arasında mülki infrastrukturun olduğu iddia edilir.

Məlumata əsasən, ABŞ-nin zərbələrindən sonra İran Silahlı Qüvvələri bölgədəki Amerika hərbi mövqelərinə qarşı cavab tədbirlərinə başlayıb. İranın ABŞ-nin regiondakı hərbi bazalarına raket və pilotsuz uçuş aparatları (PUA) ilə hücumlar həyata keçirdiyi bildirilib.

SEPAH ABŞ-nin həyata keçirdiyi hücumların bölgədə onsuz da gərgin olan vəziyyəti daha da kəskinləşdirdiyini vurğulayıb.

“ABŞ-nin hücumları Hörmüz boğazının kilidini daha da möhkəmləndirir”, – bəyanatda qeyd olunub.

SEPAH həmçinin İranın hava hücumundan müdafiə sistemlərinin ABŞ-yə məxsus MQ-9 “Reaper” tipli pilotsuz uçuş aparatını vurduğunu açıqlayıb.

Hadisənin hansı ərazidə baş verdiyi, PUA-nın hansı şəraitdə vurulduğu və ABŞ tərəfinin itki ilə bağlı məlumat verib-vermədiyi barədə açıqlamada əlavə detallar təqdim edilməyib.

İran və ABŞ arasında qarşılıqlı zərbələr fonunda regionda təhlükəsizlik vəziyyətinin daha da gərginləşdiyi bildirilir.