İran Silahlı Qüvvələri Yaxın Şərqdə yerləşən ABŞ hərbi bazalarına qarşı hücumlara başlayıb.

 İran ordusu zərbələr zamanı raket və pilotsuz uçuş aparatlarından istifadə edir.

Bundan bir neçə saat əvvəl ABŞ hərbçilərinin Hörmüz boğazı ərazisində İranın mövqelərinə zərbələr endirdiyi barədə məlumat yayılmışdı.

Qeyd edək ki, fevralın 28-də ABŞ və İsrail İrana qarşı birgə hərbi əməliyyata başlayıb. Buna cavab olaraq Tehran İsrailə və Yaxın Şərqdəki Amerika obyektlərinə zərbələr endirib.

İyunun 18-də ABŞ və İran arasında müvəqqəti anlaşma memorandumu imzalansa da, bir neçə gün sonra Vaşinqton Tehranın Hörmüz boğazında atəşkəs rejimini pozduğunu bildirib. İran isə öz növbəsində ABŞ hərbçilərini zərbələr endirməkdə ittiham edib.

İyulun əvvəlində ABŞ Prezidenti Donald Tramp Vaşinqtonla Tehran arasında atəşkəsin artıq qüvvədə olmadığını açıqlayıb.

Avqustun sonunda isə ABŞ İranın maliyyə baxımından təcrid edilməsini nəzərdə tutan “İqtisadi pariya” adlı əməliyyata başlayıb. Vaşinqton bununla Tehranın gəlir mənbələrini məhdudlaşdırmağı, həmçinin İranla əməkdaşlığı, o cümlədən İran neftinin alınması və daşınmasını davam etdirən üçüncü ölkələrin təşkilatlarına qarşı ikinci dərəcəli sanksiyalar tətbiq etməyi planlaşdırır.