Ermənistanın xarici işlər naziri Ararat Mirzoyan Rusiya-Ermənistan münasibətlərini yüksək qiymətləndirib və iki ölkə arasında mövcud əlaqələrin müttəfiqlik səviyyəsində olduğunu bildirib.

Mirzoyanın sözlərinə görə, Rusiya Ermənistan üçün sadəcə strateji tərəfdaş deyil. O qeyd edib ki, iki ölkə arasında mövcud razılaşmalar onları müttəfiqə çevirir.

“Bizim elə razılaşmalarımız var ki, onlar bizi strateji tərəfdaşlıqdan daha yüksək olan müttəfiqlik münasibətlərinə gətirib çıxarır”, – Ermənistan XİN rəhbəri deyib.

Mirzoyan əlavə edib ki, bu yanaşma hüquqi, siyasi və iqtisadi baxımdan özünü göstərir.

Nazirin açıqlaması Ermənistan Baş naziri Nikol Paşinyanın cəmi bir neçə gün əvvəl Rusiya ilə münasibətlərə dair səsləndirdiyi fikirlər fonunda diqqət çəkir. Paşinyan avqustun 27-də Rusiyanın artıq Ermənistan üçün strateji tərəfdaş olmadığını bildirib və ölkəsinin xarici siyasətində əlaqələrin transformasiyasından danışıb.

Beləliklə, Mirzoyanın son açıqlaması ilə Paşinyanın mövqeyi arasında müəyyən ziddiyyət diqqət çəkir.