Ermənistanın Baş naziri Nikol Paşinyan 2026-cı il Zayed İnsan Qardaşlığı Mükafatının təqdimetmə mərasimində iştirak edəcəyini açıqlayıb. O, bu barədə çərşənbə günü Ermənistan Milli Assambleyasında hökumətlə sual-cavab zamanı məlumat verib.
Paşinyan Zayed Mükafatı ilə Ermənistanda keçiriləcək parlament seçkiləri arasında əlaqə olub-olmaması ilə bağlı suala cavabında bildirib ki, Ermənistan vətəndaşı olmayan şəxslər ölkənin daxili siyasi proseslərində iştirak edə bilməz. Onun sözlərinə görə, bu məsələ daha çox beynəlxalq münasibətlər kontekstində qiymətləndirilməli və Ermənistanın apardığı balans və balanslaşdırma siyasətinin nəticəsi kimi dəyərləndirilməlidir.
Baş nazir qeyd edib ki, bir gün ona telefon zəngi daxil olub və Zayed İnsan Qardaşlığı Mükafatına layiq görüldüyü bildirilib. Paşinyan bu mükafatı minnətdarlıqla qəbul etdiyini, sözügedən mükafat haqqında isə əvvəllər, 2019-cu ildə təsis edildikdən sonra mediadan məlumat aldığını deyib.
“Bu, nüfuzlu bir mükafatdır. Bu il üç laureat var — mən, Azərbaycan Prezidenti və Əfqanıstandan olan qadın hüquqları müdafiəçisi”, – deyə Paşinyan bildirib və mərasimdə iştirak etməyi özünə böyük şərəf hesab etdiyini vurğulayıb.
Ermənistanın Baş naziri, ümumilikdə, bu mükafata layiq görülməsini komanda işinin nəticəsi kimi dəyərləndirib və bunun, hər şeydən əvvəl, Ermənistan vətəndaşlarının dəstəyi, etimadı və razılığı sayəsində mümkün olduğunu qeyd edib.

Urbaninfo az