Azərbaycan Prezidenti İlham Əliyev və Qazaxıstan Prezidenti Qasım-Jomart Tokayev avqustun 31-də Bişkekdə görüş keçiriblər.

Görüş zamanı İlham Əliyev qazaxıstanlı həmkarını ölkədə yeni parlamentə – Qurultaya keçirilən ilk seçkilərin uğurla başa çatması münasibətilə təbrik edib. Azərbaycan Prezidenti bildirib ki, seçkilər Qazaxıstanda Qasım-Jomart Tokayevin rəhbərliyi ilə həyata keçirilən genişmiqyaslı islahatlara xalqın dəstəyinin daha bir göstəricisidir.

Qasım-Jomart Tokayev isə təbrik məktubuna və seçkilərdə Azərbaycanlı müşahidəçilərin fəal iştirakına görə İlham Əliyevə təşəkkürünü bildirib.

Görüşdə Azərbaycan-Qazaxıstan strateji tərəfdaşlığı və müttəfiqlik münasibətlərinin uğurla inkişaf etdiyi vurğulanıb. Dövlət başçıları qarşılıqlı səfərlərin və yüksək səviyyəli təmasların ikitərəfli əlaqələrin daha da dərinləşdirilməsi baxımından əhəmiyyətini qeyd ediblər.

Tərəflər nəqliyyat və logistika məsələlərini də müzakirə ediblər. Bu çərçivədə Orta Dəhlizin əhəmiyyəti xüsusi qeyd olunub, Bakı və Astana arasında bu istiqamətdə əməkdaşlığın perspektivləri barədə fikir mübadiləsi aparılıb.

Prezidentlər Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) sammitinin keçirilməsi məsələsinə də toxunublar.

Görüş zamanı, həmçinin qarşıdakı təmaslar və qarşılıqlı maraq doğuran digər məsələlər ətrafında fikir mübadiləsi aparılıb.