Türkiyə Prezidenti Rəcəb Tayyib Ərdoğan İsrailin Yaxın Şərqdə mövcud tarazlığı pozmağa çalışdığını və regionun təhlükəsizliyi üçün təhdid yaratdığını bildirib.
Ərdoğan bu barədə “Mövlud-i Nəbi Həftəsi” proqramı çərçivəsində İstanbulda Haliç Konqres Mərkəzində çıxışı zamanı danışıb.
Türkiyə liderinin sözlərinə görə, İsrailin həyata keçirdiyi siyasət Yaxın Şərqdə sabitliyi pozmağa yönəlib. O, region ölkələrini öz çəkindirmə imkanlarını gücləndirməyə və hüquqlarını birgə müdafiə etməyə çağırıb.
“Biz güclü olmalı, çəkindirmə potensialına malik olmalı, hüquqlarımızı birlikdə müdafiə etməli və regionumuzda sülh və təhlükəsizliyi qurmalıyıq”, – Ərdoğan deyib.
Türkiyə Prezidenti İsrail rəhbərliyinin qeyri-humanist siyasət həyata keçirdiyini də bildirib. Onun sözlərinə görə, Təl-Əvivin addımları yalnız İsrailin qonşu ölkələrinə deyil, regionda sülhün və humanitar dəyərlərin tərəfdarı olan bütün qüvvələrə təsir göstərir.
Ərdoğan İsraili Qəzza zolağı, İordan çayının qərb sahili və Livanda münaqişələrin gərginləşdirilməsində ittiham edib.
Türkiyə lideri müsəlman ölkələrini problemlərin həllində digər dövlətlərin yardımına arxalanmamağa çağırıb. O bildirib ki, beynəlxalq ictimaiyyət bu münaqişələrin həllinə kifayət qədər töhfə vermir.
Ərdoğan regionda sülh və təhlükəsizliyin təmin olunması üçün ölkələr arasında həmrəyliyin gücləndirilməsinin vacibliyini vurğulayıb.