İsrail Livandakı vəziyyətin tənzimlənməsi üzrə pilot proqramın faktiki olaraq uğursuzluğa düçar olduğunu ABŞ-a bildirib. Proqrama əsasən, Livanın cənub hissəsinə nəzarətin Livan ordusuna verilməsi nəzərdə tutulurdu.
“The Jerusalem Post”un məlumatına görə, İsrail hərbçiləri Livan ordusunun “Hizbullah”ın mövqelərinin və obyektlərinin məhv edilməsində faktiki olaraq iştirak etmədiyini bildiriblər. Hətta İsrail tərəfi hədəflərin koordinatlarını Livan ordusuna təqdim etdikdə belə, hərbçilərin hər hansı tədbir görmədiyi qeyd olunur.
İsrail hərbi rəhbərliyinin qənaətinə görə, Livan ordusunun komandanı Rudolf Haykal “Hizbullah” qüvvələri ilə qarşıdurmadan qəsdən yayınır və İsrail Müdafiə Ordusuna (ÇAXAL) dəstək vermək üçün lazımi addımları atmır.
İsrail komandanlığı həmçinin bildirir ki, Livan hərbçiləri “Hizbullah” döyüşçüləri ilə faktiki olaraq silahlı toqquşmaya girmirlər.
Məlumata görə, məhz bu səbəbdən İsrail pilot proqramın Livanın digər ərazilərinə genişləndirilməsində maraqlı deyil.