ABŞ Dövlət Departamenti Yaxın Şərqdə daha əvvəl təxliyə edilmiş amerikalı diplomatların bölgədəki səfirliklərə qaytarılmasına hazırlaşır.

“New York Times” qəzetinin ABŞ Dövlət Departamentindəki mənbələrə istinadən yaydığı məlumata görə, diplomatların geri qayıtması və Yaxın Şərqdəki diplomatik nümayəndəliklərdə tətbiq olunan fövqəladə tədbirlərin mərhələli şəkildə dayandırılması artıq bu həftə başlaya bilər.

Xatırladaq ki, ABŞ diplomatları İranla bağlı eskalasiya və bölgədə hərbi qarşıdurmanın kəskinləşməsi fonunda bir sıra səfirliklərdən təxliyə edilmişdi.

Qəzetin məlumatına görə, Vaşinqtonun belə bir addım atması ABŞ administrasiyasının İranla genişmiqyaslı hərbi əməliyyatların yenidən başlayacağına dair gözləntilərinin azaldığını göstərə bilər.

Məlumata əsasən, diplomatların ilk olaraq ABŞ-ın Livandakı səfirliyinə qaytarılması planlaşdırılır. Bununla belə, səfirliyin ilkin mərhələdə tam heyətlə fəaliyyət göstərməyəcəyi bildirilir.

Daha sonra ABŞ-ın İsrail, İordaniya və Omandakı səfirliklərində diplomatik heyətin tam tərkibdə fəaliyyətə qaytarılması nəzərdə tutulur.

“New York Times”ın əldə etdiyi sənədlərə görə, Birləşmiş Ərəb Əmirlikləri, Səudiyyə Ərəbistanı, Qətər və Livandakı diplomatik nümayəndəliklərdə ilkin mərhələdə ştat vahidlərinin 85 faizədək doldurulmasına icazə veriləcək.

İraq, Küveyt və Bəhreyndəki ABŞ diplomatik nümayəndəliklərində isə əməkdaşların sayının ştatın 75 faizinə qədər bərpa ediləcəyi gözlənilir.

Beləliklə, ABŞ-ın diplomatları bölgəyə mərhələli şəkildə qaytarmaq qərarı Yaxın Şərqdə təhlükəsizlik vəziyyətinin əvvəlki mərhələyə nisbətən sabitləşdiyi barədə Vaşinqtonun qiymətləndirməsinə işarə edir.