Qazaxıstan Prezidenti Kasım-Jomart Tokayev avqustun 23-də keçiriləcək parlament seçkilərinin ölkə tarixində ən əlamətdar və maraqlı seçkilərdən biri olacağını bildirib.

Tokayev seçki kampaniyası çərçivəsində siyasi partiyaların öz proqramlarını seçicilərə təqdim etdiyini, KİV-də təşviqat apardığını, ümumrespublika televiziya debatlarında və sosial şəbəkələrdə müzakirələrə qatıldığını qeyd edib.

“Şübhəsiz ki, bu seçkilər, yəqin ki, ölkəmizin tarixində ən maraqlı seçkilər kimi yadda qalacaq”, – deyə Qazaxıstan Prezidenti vurğulayıb.

Onun sözlərinə görə, seçicilər siyasi partiyaların ölkənin gələcəyi ilə bağlı mövqeləri, eləcə də iqtisadiyyat, mədəniyyət və digər sahələrin inkişafına dair təklifləri ilə yaxından tanış olmaq imkanı əldə ediblər.

Qeyd edək ki, avqustun 23-də Qazaxıstanda yeni, birpalatalı parlamentə – Qurultaya ilk dəfə seçkilər keçiriləcək. Yeni Konstitusiya martın 15-də keçirilmiş ümumxalq referendumunda qəbul edilib və iyulun 1-dən qüvvəyə minib.

Konstitusiya dəyişikliklərinə əsasən, ölkə ikipalatalı parlament modelindən birpalatalı Qurultay sisteminə keçib. Yeni parlament 145 deputatdan ibarət olacaq.

Yeni qaydalara əsasən, bütün deputatlar vahid ümumrespublika seçki dairəsi üzrə yalnız siyasi partiyaların siyahıları əsasında seçiləcək. 2022-ci il hadisələrindən sonra yenidən tətbiq edilmiş birmandatlı seçki dairələri isə ləğv olunub.