Türkiyədə 61 hərbi gəmi inşa edilir – aviadaşıyıcı və sualtı qayıq da sıradadır
Türkiyənin gəmiqayırma zavodlarında hazırda 61 döyüş gəmisinin inşası aparılır. Onlardan 37-si ölkənin Hərbi Dəniz Qüvvələri üçün nəzərdə tutulub.
Türkiyə Hərbi Dəniz Qüvvələrinin komandanı admiral Ercüment Tatlıoğlu bildirib ki, ölkənin üç tərəfdən dənizlərlə əhatə olunması milli donanmanın gücləndirilməsini zəruri edir.
Hazırda Türkiyə gəmiqayırma zavodlarında aviadaşıyıcı, hava hücumundan müdafiə imkanlarına malik TCG Kocatepe esminesi və milli sualtı qayıq inşa olunur. Ölkənin hərbi gəmilərində şaquli qalxıb-enə bilən pilotsuz uçuş aparatlarından da istifadə edilir.
Admiralın sözlərinə görə, TB3 pilotsuz uçuş aparatları TCG Anadolu desant gəmisindən havaya buraxılır.
Türkiyə eyni zamanda pilotsuz suüstü və sualtı aparatların, eləcə də milli silah sistemlərinin hazırlanması istiqamətində fəaliyyətini genişləndirir. Ölkənin hazırladığı ATMACA gəmiəleyhinə raketi, AKYA torpedosu, Hisar zenit-raket sistemi və MALAMAN minası artıq silahlı qüvvələrin arsenalında istifadə olunur.
Türkiyə Müdafiə Nazirliyinin əsas hədəfi ölkənin, o cümlədən Hərbi Dəniz Qüvvələrinin döyüş qabiliyyətini daha da artırmaq və milli donanmanı effektiv çəkindirmə gücünə çevirməkdir.
