ABŞ Prezidenti Donald Tramp Davosda keçirilən Ümumdünya İqtisadi Forumunda “Sülh Şurası”nın nizamnaməsini təsdiqləməyi planlaşdırır. Bu qurum Qəzza sektorunda vəziyyətin tənzimlənməsi üçün yaradılıb.
Məlumata görə, sənədin rəsmi imzalanması 22 yanvar tarixində baş tutacaq və bu, təşəbbüsün rəsmi başlanğıcı olacaq. Layihəyə əsasən, Tramp Şuranın ilk sədri olacaq və yeni üzvlərin dəvət olunması məsələlərində şəxsən qərar verəcək.
Şura üzvləri statusu əldə etmək üçün ilk il ərzində ən azı 1 milyard dollar vəsait ödəməlidirlər. Bu tələb beynəlxalq liderlərin tənqidinə səbəb olub. Bəzi dəvət olunmuş dövlətlər isə Trampın maliyyə üzərində təkbaşına nəzarətindən narahatdırlar.
Təşəbbüs beynəlxalq diplomatiya dairələrində geniş müzakirə mövzusu olub və forum zamanı əsas diqqət mərkəzlərindən biri olacağı gözlənilir.