Rusiya Müdafiə Nazirliyinin məlumatına görə, yanvarın 14-də gün ərzində Rusiya regionları üzərində Ukraynaya məxsus 39 pilotsuz uçuş aparatı (PUA) məhv edilib.
Nazirliyin Telegram kanalında yayılan açıqlamada bildirilib ki, Moskva vaxtı ilə saat 13:00-dan 20:00-dək hava hücumundan müdafiə qüvvələri təyyarə tipli 39 Ukrayna PUA-sını aşkar edərək zərərsizləşdirib.
Məlumata əsasən, ən çox pilotsuz uçuş aparatı Krasnodar diyarı üzərində vurulub — 12 PUA. Azov dənizinin akvatoriyası üzərində isə 11 PUA məhv edilib.
Bundan əlavə, Belqorod vilayəti üzərində 7, Rostov vilayəti üzərində 4, Kursk vilayəti üzərində 3, Krım üzərində isə 2 pilotsuz uçuş aparatı vurulub.
Qeyd edək ki, yanvarın 8-də Xerson vilayətinin rəhbəri Vladimir Saldo bildirib ki, qarşı tərəf vilayət ərazisindən 70-dən çox zərbə PUA-sı ilə kütləvi uçuş həyata keçirməyə cəhd edib. Onun sözlərinə görə, bu cəhd Rusiya hərbçiləri tərəfindən qarşısı alınıb. “Dnepr” qoşun qruplaşmasının hava hücumundan müdafiə bölmələri 18 düşmən PUA-sını vurub, qalan pilotsuz uçuş aparatları isə digər regionların HHM vasitələri tərəfindən məhv edilib.

Urbaninfo.az