İranın xarici işlər naziri Abbas Araqçi ilə ABŞ Prezidentinin xüsusi nümayəndəsi Stiven Uitkoff arasında ötən həftəsonu əlaqə olub.
Xarici KİV-lərin məlumatına görə, tərəflər İranda baş verən etirazlar fonunda mövcud vəziyyəti, eləcə də yaxın günlərdə mümkün görüş perspektivlərini müzakirə ediblər. Bildirilir ki, təmas ABŞ Prezidenti Donald Trampın İrana qarşı hərbi gücdən istifadə ilə bağlı açıqlamalarından sonra baş tutub.
Mənbələrə əsasən, bu əlaqə Tehranın Vaşinqtonla gərginliyin azaldılmasına nail olmaq və ya mümkün addımlardan əvvəl vaxt qazanmaq cəhdi kimi qiymətləndirilir.
Qeyd olunur ki, danışıqların hansı formatda aparıldığı – telefon danışığı, yoxsa yazılı mesajlaşma yolu ilə baş tutduğu açıqlanmayıb. Daha əvvəl tərəflər İranın nüvə proqramı ilə bağlı müzakirələri məhz yazılı mesajlar vasitəsilə həyata keçiriblər.