Azərbaycan və Ermənistan arasında mümkün iqtisadi əməkdaşlıq istiqamətində ilkin müzakirələr aparılır. Urbaninfo.az xəbər verir ki, Ermənistanın baş naziri Nikol Paşinyan bildirib ki, tərəflər hazırda qarşılıqlı maraq doğuran məhsulların siyahısını nəzərdən keçirirlər.
Onun sözlərinə görə, Bakı və İrəvan alınıb-satıla biləcək mallarla bağlı siyahılar mübadiləsi aparıb və hazırda təqdim olunan təkliflər öyrənilir. Paşinyan qeyd edib ki, proses davam edir və konkret nəticələr olduqda ictimaiyyətə məlumat veriləcək.
Ermənistan hökumətinin başçısı əlavə edib ki, rəsmi İrəvan özəl şirkətləri Azərbaycandan neft məhsulları almağa məcbur etmir. Onun sözlərinə görə, hökumət sadəcə belə bir imkanın mövcudluğu barədə məlumat verib.
Paşinyan eyni zamanda Zəngəzur dəhlizi ilə bağlı beynəlxalq nəqliyyat təşəbbüsü kimi təqdim edilən TRIPP layihəsi barədə də danışıb. O bildirib ki, hazırda bu istiqamətdə müəyyən işçi proseslər gedir və Ermənistan–Azərbaycan sərhədinin demarkasiyası uyğun şərait yarandıqda davam etdiriləcək.
Baş nazir vurğulayıb ki, kommunikasiyaların açılması və layihələrin reallaşması üçün sərhədin bəzi hissələrinin demarkasiyası zəruridir və bu istiqamətdə yerində işlər aparılır, paralel olaraq müvafiq sənədlər hazırlanır.