Mayın 17–22-də Bakıda keçiriləcək Ümumdünya Şəhərsalma Forumunun (WUF13) On Üçüncü sessiyası çərçivəsində təşkil olunacaq tərəfdaş tədbirlər üçün qeydiyyat prosesinin başa çatmasına cəmi bir həftə qalıb. Müraciətlərin qəbulu üçün son tarix 29 yanvar 2026-cı ildir.
Forum çərçivəsində təşkil olunan tərəfdaş tədbirləri şəhərsalma sahəsində beynəlxalq əməkdaşlıq və dialoq platforması rolunu oynayır. “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusuna uyğun tədbirlər təşkil etmək istəyən qurumlar və təşkilatlar müraciətlərini UN-Habitat GEMS platforması vasitəsilə təqdim etməlidirlər.
Tədbirlər yeddi kateqoriya üzrə keçiriləcək: Şəbəkələşmə (Networking), Vahid BMT (One UN), Dayanıqlı İnkişaf Məqsədlərinin tətbiqi (SDGs in Action), Şəhər kinoteatrı (Urban Cinema), Şəhər Kitabxanası (Urban Library), Şəhərlərin Səsi (Voices from Cities) və WUF Akademiyası (WUF Academy). Hər kateqoriya üzrə yalnız bir müraciət təqdim etmək mümkündür.
Qeydiyyatdan keçən iştirakçılar şəxsi paneldəki “Applications / Müraciətlər” bölməsində tələblərlə tanış olub müraciətlərini yekunlaşdıra bilərlər. Tərəfdaş tədbirləri dayanıqlı şəhər inkişafı sahəsində qabaqcıl təcrübələrin və innovativ həllərin təqdim olunması, bilik və təcrübə mübadiləsi, institusional əməkdaşlıqlar və qlobal şəhər gündəliyinə töhfə vermək imkanını yaradır.
Əlavə məlumat üçün unhabitat-events@un.org ünvanı ilə əlaqə saxlamaq mümkündür.