İsveçrənin Cenevrə şəhərində 15–16 yanvar 2026-cı il tarixlərində Nizami Gəncəvi Beynəlxalq Mərkəzinin BMT-nin Cenevrə Ofisi ilə birgə təşkil etdiyi 35-ci Ali Səviyyəli Toplantı çərçivəsində “Qlobal mənzil böhranının birgə həlli” mövzusunda panel müzakirəsi keçirilib.
Tədbirdə 30-dan artıq ölkədən 50-dən çox yüksək səviyyəli beynəlxalq nümayəndə iştirak edib. Azərbaycan Respublikasının Dövlət Şəhərsalma və Arxitektura Komitəsinin sədri, WUF13-ün milli koordinatoru Anar Quliyev və BMT-nin Məskunlaşma Proqramının icraçı direktoru Anaklaudia Rossbax panelin əsas məruzəçiləri olub.
Müzakirələrdə dayanıqlı və əlçatan mənzil təminatının şəhər inkişafının mərkəzində olduğu vurğulanıb, qlobal çağırışların – iqlim dəyişikliyi, urbanizasiya və bərabərsizlik kimi məsələlərin kollektiv yanaşmalarla həllinin vacibliyi qeyd edilib. Anar Quliyev, həmçinin Qarabağ və Şərqi Zəngəzurda həyata keçirilən şəhərsalma layihələrinin uzunmüddətli sülh və regional əməkdaşlığa töhfə verdiyini diqqətə çatdırıb.
Toplantıda Ümumdünya Səhiyyə Təşkilatı, BMT-nin Ticarət və İnkişaf üzrə Konfransı, Beynəlxalq Telekommunikasiya İttifaqı və digər nüfuzlu beynəlxalq təşkilatların rəhbərləri iştirak ediblər.
Sonda Anar Quliyev iştirakçıları 17–22 may 2026-cı il tarixlərində Bakıda keçiriləcək WUF13-ün On Üçüncü sessiyasına dəvət edib. Panel, çoxsahəli əməkdaşlıqların gücləndirilməsi və dayanıqlı şəhər inkişafının sürətləndirilməsi baxımından beynəlxalq platforma kimi diqqət çəkib.

Urbaninfo.az