Ürək problemləri yalnız sinə ağrısı deyil - Diqqət edilməli gizli simptomlar
Bir çox insan ürək xəstəliklərinin klassik əlamətlərini — məsələn, sinə ağrısı və ya nəfəs darlığını yaxşı tanıyır. Lakin ürəyin fəaliyyətindəki pozuntular bəzən daha az nəzərə çarpan simptomlarla da özünü göstərə bilər və bu əlamətlər çox vaxt diqqətdən kənarda qalır.
Mümkün siqnallardan biri baş ağrısı ola bilər, xüsusilə də ağrı başın arxa hissəsində hiss olunursa. Bəzən bu, arterial təzyiqin yüksəlməsinin yeganə əlaməti olur. Buna görə də belə simptom yaranarsa, qan təzyiqini ölçmək tövsiyə olunur.
“Baş gicəllənməsi və huşun itirilməsi də ürəyin fəaliyyətindəki pozuntularla, ilk növbədə aritmiya — yəni ürək döyüntülərinin ritminin pozulması ilə bağlı ola bilər. Aritmiyanın bəzi formalarında qan dövranı daha az effektiv olur və nəticədə beyinə gedən qan axını azalır. Bu isə baş gicəllənməsinə və hətta qısa müddətli huş itirməyə səbəb ola bilər.
Ürək problemləri ilə əlaqəli ola bilən daha bir az bilinən simptom qarının yuxarı hissəsində ağrıdır.
Qarının yuxarı hissəsində olan narahatlıq həmişə mədə-bağırsaq xəstəlikləri ilə bağlı olmur. Bəzi hallarda bu hisslər ürək ağrısının sinir yolları ilə yayılması nəticəsində məhz həmin nahiyədə hiss oluna bilər.
Bundan əlavə, mütəxəssislər dəri üzərində yaranan dəyişikliklərə də diqqət yetirməyi məsləhət görür. Söhbət xolesterinin toplanması nəticəsində dərinin altında əmələ gələn sarımtıl lövhəciklər və düyünlər — ksantomlardan, həmçinin göz qapaqları nahiyəsində yaranan ksantelazmalardan gedir.
Belə yaranmalar qanda xolesterinin yüksək olmasına — yəni hiperkolesterinemiyaya işarə edə bilər. Bu isə öz növbəsində ürək-damar xəstəliklərinin əsas risk faktorlarından biridir.
Xolesterinin yüksək olması və aterosklerozun inkişafı başqa əlamətlərlə də özünü göstərə bilər. Bunlara yeriyərkən baldır əzələlərində ağrı, ayaqlarda keyimə və ayaqlarda tüklərin tökülməsi daxildir. Bu əlamətlər aşağı ətrafların arteriyalarında xolesterin yığılması ilə bağlı ola bilər.
Ateroskleroz bütün bədənin arteriyalarını təsir edən bir prosesdir. Buna görə də ayaq damarlarında dəyişikliklər varsa, çox güman ki, ürəyin arteriyalarında da oxşar problemlər artıq mövcuddur, sadəcə hələ açıq şəkildə özünü göstərmir.
Sadalanan simptomlar hər zaman birbaşa ürək xəstəliyinə işarə etmir, çünki onların başqa səbəbləri də ola bilər.
Buna görə də belə əlamətlər ortaya çıxarsa, həkimə müraciət etmək, məsləhət və lazımi müayinələrdən keçmək daha yaxşıdır. Bu, problemi vaxtında aşkar etməyə və düzgün müalicə taktikasını müəyyən etməyə kömək edəcək.
Urbaninfo.az
