İcbari Tibbi Sığorta üzrə Dövlət Agentliyinin sədri Zaur Əliyev bildirib ki, 2025-ci ildə icbari tibbi sığorta çərçivəsində xidmətlərdən yararlananların sayı və müraciətlər əhəmiyyətli dərəcədə artıb. Əhalinin 54%-i tibbi sığorta ilə təmin olunub, pasiyentlərin sayı 5,4 milyon, müraciətlərin sayı isə 15,8 milyon olub. Ən çox istifadə olunan xidmətlər arasında ixtisaslı həkim müayinələri, radioloji və USM xidmətləri, ginekoloji müayinələr yer alıb.
Sığortanın əhatəsi genişləndirilib: artıq müəyyən müddətə və ya ömürlük azadlıqdan məhrum edilən şəxslər, eləcə də qaçqın statusu almış və BMT-nin himayəsində olan şəxslər tibbi xidmətlərlə təmin ediləcək. Həbsxanalarda ədliyyə sistemi tərəfindən təmin olunmayan tibbi xidmətlər də icbari tibbi sığorta hesabına qarşılanacaq.
İlkin səhiyyə xidmətlərinin təkmilləşdirilməsi pilot layihəsi çərçivəsində Bərdə rayonunda şəbəkə optimallaşdırılıb. 1 yeni Ailə Sağlamlıq Mərkəzi yaradılıb, 31 tibb məntəqəsi həkim məntəqələrinə birləşdirilib. Təxminən 3,5 milyon nəfərin əhalisinin əhatə olunduğu layihə çərçivəsində kadr hazırlığı və xidmət keyfiyyətinin artırılması da təmin olunur. Ölkə üzrə 78 Ailə Sağlamlıq Mərkəzi, 871 həkim məntəqəsi və 1168 tibb məntəqəsi optimallaşdırılacaq.